Zhu Xi

Dr Zhu Xi (chin. 朱熹 Zhū Xī/Chu Hsi; * 18. Oktober 1130 z Youxi, Fujian-Provinz, China; † 23. April 1200) isch dr wichtigscht Neokonfuzianer vu China gsii. Är het in dr Song-Dynaschti an dr beriemte Akademi vu dr Wysse Hirsch-Grotte glehrt un isch Lehrer un Beroter vum Song-Chaiser gsii.

Dr Zhu Xi het iber 70 Wärch gschriibe. In dr Wuyi-Bärg un an andere Ort het er iber 50 privati hecheri Lehraastalte grindet un het as Privatlehrer e baar Döusert Schueler uusbildet. Vil vu syne Schueler sin beriemti Theoretiker wore. In e jedere Stadt, wun er gschafft het, het er e Lehraastalt grindet.

Unter dr Wärch vum Zhu Xi isch syy Buech Die Familiennormen der Familie Zhu e wichtig Wärch iber d Regelig vu Familienaaglägehaite wore. Churz vor syym Dod het er syni Aamerkige zum Buech „Das Große Lernen“ (大學 dàxué) korrigiert, wu bis in s 20. Johrhundert as Standard fir d Beamtebriefig dient ghaa het. Dr Zhu Xi het Das Große Lernen zämme mit dr „Gspräch vum Konfuzius“ (論語 / 论语 lùn yǔ oder lún yǔ), em Buech „Mitte und Maß“ (中庸 / 中庸 zhōng yōng) un em Buech vum Mencius (孟子 Mèngzǐ) zue dr sognännte „Vier Biecher“ zämmegfiegt.